沙卡布拉揚作品-題畫

題畫

共你斟酌看起來
親像阮的祖先
亦親像阮阿公
閣介成阮阿爸

我想將來有一工
可能亦會親像你
誰敢講毋相信
閣天公就會講：「當然」
抑若阮的囝孫
佮你閣較無熟似
若認毋著講你是印第安

佇咱這个大地之上
捌有過你的跤跡
風絲仔裡的聲音
留著對你的歌頌
你恬靜咧看阮
阮看你是如看家己
無半滴目屎佇咧
歲月中風霜的面容

無論是到佗位
阮攏共你記會牢
亦會想起著你
親像你這馬的注目
阮一直相對面頭前
一條千辛萬苦的路
阮猶原接咧行

阮看你
你看阮
阮看著家己