向陽台語詩欣賞─草蜢仔無意弄雞公

草蜢無意弄雞公
和草蜢仔避藏田岸邊
同款，阮佇亭仔腳藏避
佇夜市走縱，隨時著準備
背起包袱仔此位來啊彼位去

和草蜢仔撲跳稻埕邊
無同款，阮撲跳佇街市
隱身佇柱腳，隨時做準備
背起包袱仔此邊溜啊彼邊避

只是為著無店面做生理
貨色一包袱，土腳來展開
任您揀任您翻任您講價錢
買著俗貨好貨算您好運氣

只是因為無攤仔好擺置
貨色一包袱，委屈踮路邊
在您喝在您出在您加減添
賣到了本了錢是我所歡喜

四界徐，四界去
草蜢仔不驚雞公來啄伊
稻埕粟仔舖地滿滿是
雞公生氣草蜢仔戲弄伊

四界縱，四界避
阮是上驚警察大人來噴嗶
人客褲袋銀票滿滿是
大人取締阮的生活無可依

不過是為著賺淡薄錢
親像草蜢款，阮流動不是惡意
不過是為著貪小生理
親像草蜢款，阮藏避是不得已

不是弄雞公，你來阮就去
路邊盡賺不過只是三分錢
不免劈撲跳，你追阮就避
對不住的所在請大人多多支持