向陽台語詩欣賞─三更半暝一隻貓仔喵喵哮

        三更半暝一隻貓仔喵喵哮

天光了後阮就愛去菜市仔賣菜

想起跨過臭水溝一腳一腳烏金的皮鞋

親像看見一塊一塊抹胭脂嘩價的嘴唇

佇這陣冷風微微吹來冷靜的闇時

忽然阮聽見窗仔外一隻貓仔喵喵哮

一隻貓仔喵喵哮，四年前有一暝

阮翁彼時猶未出海討魚，同款也聽見

如今阮賣菜賺錢罕罕也賺少年家仔詼笑

每日菜市仔落貨轉來窗仔門鎖住看電視

冷靜的闇時哪會聽見貓仔喵喵哮

貓仔喵喵哮，三更半暝醒來

看見化妝檯「密斯佛陀香水」後壁

彼蕊早起時開得好好的水仙煞來變青去

阮縮佇被底抱著枕頭，冷風微微

親像翁婿新婚彼暝叫阮的聲聲愛意

聲聲愛意，一隻貓仔喵喵哮

佇這陣冷風微微吹來嘩價聲的闇時

阮趕緊爬起來，坐佇化妝檯頭前

抹胭脂噴香水好好打扮若一蕊水仙

天光了後著愛擱去菜市仔賣菜賺淡薄仔錢