向陽台語詩欣賞─搬布袋戲的姊夫

搬布袋戲的姊夫

彼一日，阿姊倒轉來

帶醃腸水果，帶真濟

好耍的物件，阮最合意的

是姊夫愛弄的，一仙布袋戲尪仔

有一年，庄裡天公生

公厝的曝粟仔場，掌中劇團

做戲拜天公，阮最愛看的彼仙

為江湖正義走縱的，布袋戲尪仔

姊夫就是掌中劇團

搬布袋戲尪的頭師，彼一年

姊夫的劇來庄裡公演

鑼鼓聲中，西北派打倒東南派

阿姊彼時猶是

十七八歲的姑娘，有一日

走去劇團找弄戲的頭師

嬌聲柔語，東南派拍贏西北派

愛看布袋戲的阮，只不過

知也東南派是正人君子，只不過

知也西北派是妖魔鬼怪，阮未瞭解

東南派哪著一定打贏西北派

時常纏著阿姊的阮，猜想

軟心腸的阿姊就是東南派，猜想

弄戲尪的頭師就是西北派，阮想未到

東南派哪會和西北派講和

彼一年，頭師變姊夫

阿姊轉來的時陣帶了很多戲尪仔

阮問阿姊：東南派有贏西北派否

阿姊笑一下，目屎忽然滾落來

有一工，阿母帶阮

去姊夫伊厝看阿姊，說是兩人冤家

阮問阿母：東南派是不是輸與西北派

阿母笑一下，目屎煞也滾落來

看著姊夫，姊夫越頭做伊去

阮罵西北派妖魔鬼怪無良心

看著阿姊，阿姊犁頭不講話

阮笑東南派正人君子欠勇氣

想未到姊夫和阿姊忽然好起來

真奇怪冤家到尾煞會變親家

阿母歡喜的搓阮的頭，講阮就是

彼仙，為江湖正義走縱的布袋戲尪仔