週一母語日 新詩欣賞

風颱

佇燒熱的海洋

阮鬱卒的心

毋知是按怎

煞一時絞規 khiû

絞作一個風颱

想欲共家己吹走

吹去遙遠無人的世界….

阮小小的世界

無疑誤

你是一個強烈的風颱

將阮親像中央山脈

遐邇勇固的愛情城堡

吹倒了了矣

聽人在講，愛情

其實本身就是

來無影去無踪的

風颱…..

風颱過去，日頭若出來

就足少人會知影

阮的心內

猶原透風落雨

恐驚這是久久長長的代誌

毋過，無論風颱有偌大

阮攏會記得天地的疼惜

繼續共碎糊糊的愛

一塊一塊疊起來

變作你

規世人一個溫柔的城堡…..